LAOAG CITY – Nakasaganan ti Department of Agriculture (DA) a mangipaay ti fuel subsidy para kadagiti mannalon ken mangngalap.
Daytoy ket no agtultuloy ti panagngato ti presio ti produkto a petrolyo gapu iti tension idiay Middle East.
Inbatad ni Department of Agriculture Spokesperson Assistant Secretary Arnel de Mesa, addan ti nakasagana a P100 milyon a pundo ti Department of Agriculture para iti one-time fuel subsidy.
Iti babaen ti guidelines, makaawat ti P5,000 ti tunggal kualipikado a mannalon ken P3,000 met ti tunggal mangngalap.
Dakkel ti nagbalin nga epekto ti nangina a gasolina iti kadagupan a gastos iti produksion iti sektor.
Iti agdama, adda ti sumurok 9,000 a mannalon ken 15,000 a mangngalap ti karaman iti inisyal a benepisiario ti Department of Agriculture.
Mausar ti fuel subsidy card kadagiti gasolinaan idinto a dagiti adayo a lugar ket maikkan ti voucher tapno mausar ti fuel subsidy.
Kabayatanna, agbalin a prioridad ita dagiti saan pay a nakaawat ti fuel subsidy.
