LAOAG CITY – Panagtalon ken panagtaraken kadagiti dingwen ti puonan tapno makapagadal ken agballigi iti biag.
Daytoy ti nagsarmingan ni Dr. Paulo Tunac, residente iti Brgy. 8-Margaay iti ili ti Vintar ken agdama a principal iti Buttong Integrated School ditoy siudad ti Laoag.
Segun ken ni Tunac, sakbay a nagbalin a principal ket ado ti nagbalin a kapadasan na idi ubing ken agbasbasa pay laeng.
Inbatad na a kas maysa nga anak ti mannalon, masapa da nga agturong iti bantay tapno agala iti masida wenno masapol iti pagtungo.
Kuna na a saan a dagus a nagderetso nga agbasa iti sekondarya gapu iti kinarigat ti biag ken nagtrabaho iti maysa a tawen sakbay a nagsubli iti panagadal.
Inbunannag na nga idi nakaturpos ti sekondarya ket arig a napukawan ti namnama a makapagturpos iti kolehiyo ngem babaen iti maysa nga scholarship ket naiturpos na ti kurso a Bachelor of Secondary Education Major in Physics.
Mainaig iti daytoy, inbatad ni Tunac a saan a nagpatingga iti panagtrabaho ken nangala ti Masters in Science Education, Administration and Supervision ken Doctor of Education major in Education Management pakairamanan ti naudi nga inadal na a Doctor in Philosophy.
Kuna na a babaen iti daytoy, nai-promote kas principal agingga a naidestino iti Buttong Integrated School.
Kabayatanna, kuna na a nu awan dagiti naanos ken nagaget a nagannak na ket awan ti katulungan na iti panagballigi na.
Inbunannag na a babaen pay iti pangadal ti nagannak kadakuada ket nasapa a nasursuro na ti nagbalin a responsable.
Innayun ni Tunac a saan a makaumanay ti laing nu saan a buyugan ti panagbalin a nagaget.
