LAOAG CITY – Inlungalong ni Rep. Khymer Adan Olaso ti House Bill No. 11211 a gagem a mangipatungpal ti dusa a patay iti babaen ti firing squad para kadagiti opisial ti gobierno a mapaneknekan a nagbasol, saan nga umiso a panagusar ti pundo ken plunder.
Daytoy ket iti baet ti kumarkaro nga isyu ti korapsion ditoy pagilian.
Kalikagum ti mailunglungalong a gakat a malappedan ti korapsion ken maisubli ti talek ti publiko kadagiti institusion ti gobierno.
Sakupen ti mailunglungalong a gakat dagiti amin nga opisial ti gobierno, manipud iti Presidente agingga kadagiti barangay officials, dagiti adda iti ehekutibo, lehislatibo ken hudikatura pakairamanan dagiti miembro ti Armed Forces of the Philippines ken Philippine National Police.
Babaen iti daytoy, maipakpakita nga awan ti asinoman ti rumbeng a maisalakan iti linteg.
Naammoan a ti dusa a patay ket saanen a baro ditoy Pilipinas. Immuna daytoy a naikkat idi 1987 ngem naisubli idi 1993 ken naminsan manen a naisubli idi 2006. Ti pannakaisubli ti nasao a pannusa ket mangitunda dagiti etikal ken praktikal a saludsod.
Nupay kasta, adda dagiti immunan a grupo ti nangibaga a ti dusa a patay ket saan nga epektibo kontra iti krimen imbes ket ad-adda a paigetan dagiti maipatpatungpal nga anti-corruption agencies, pasayaaten ti transparency ken ilungalong ti panangipataw ti pannusa.
Para kadagiti sumupsuporta iti gakat, mamatida a ti kinadagsen ti pannusa ket mangitunda ti buteng ken agbalin nga epektibo a panangbuteng kadagiti opisial ti gobierno.
Kabayatanna, karaman kadagiti saan nga umanamong iti death penalty ket ti simbaan Katolika.
