LAOAG CITY – Naipila iti Kamara de Representantes ti gakat a mangimanmandar iti panangipaay ti 14th month pay kadagiti empleado iti gobierno ken pribado a sektor.
Inlungalong daytoy ni Kabayan party-list Representative Ron Salo babaen iti House Bill No. 520 tapno maipaayan ti 14th month pay dagiti empleado iti laksid ti status of employment dagitoy.
Babaen iti gakat nga inpila ni Salo, ti 13th month pay ket required babaen iti linteg a maited kadagiti empleado sakbay wenno iti mismo nga aldaw ti Mayo 31 iti kada tawen para iti school enrollment dagiti dependents dagiti empleado.
Ti met 14th month pay ket maited kadagiti empleado sakbay wenno iti mismo nga aldaw ti November 30 iti kada tawen para iti traditional Christmas celebration.
Para kadagiti na-empleyo nga awanan pay ti makatawen, ti 14th month pay ket maibasar iti bilang ti bulan da iti trabaho.
Nakailanad pay iti gakat a ti 14th month pay ket saan a nababbaba ngem iti monthly basic salary ti empleado.
