LAOAG CITY – Inbatad ni Dr. Ely Pascua, principal iti Badoc South Central School a napintas a gakat ti inlungalong ni Marikina City Representative Stella Quimbo a kalikagum a mangited ti Special Risk Allowance kadagiti mangisursuro a makipagpaset iti face to face classes.
Kuna na a nu bilang maaprubaran iti nasao a gakat, naruay ti pagsayaatan a maited daytoy kadagiti pada na a mangisursuro.
Segun ken ni Pascua, pudno nga adda ti maawat da a sweldo iti kada bulan ngem ado ti pakaipananan na.
Inbatad na nga apaman a maaprubaran ti gakat ken maipaay ti Special Risk Allowance, malag-anan dagiti mangisursuro kadagiti pagkasapulan iti pagadalan ken kasta met iti pamilya.
Inbunannag na a kangrunaan daytoy ti panagbalin dagiti mangisursuro a frontliners bayat ti pannakaisayangkat ti face-to-face classes.
Immunan nga inpakaammo ni Pascua nga iti Badoc South Central School ket manarimaan ti panagawat na ti enrollees.
Innayun na a naiget ti panagsagana ti pagadalan para iti masungad nga school year 2022-2023 kangrunaan dagiti kasapulan para iti panangsurot ti pagalagadan kontra iti covid-19.
Kuna na a fully vaccinated aminen dagiti mangisursuro ken agtultuloy ti pananggutigot da kadagiti sumrek nga agad-adal nga agpabakuna kontra iti covid-19 sakbay ti panangrugi ti klase.
Maipalagip a babaen iti inlungalong ni Marikina City Representative Stella Quimbo nga House Resolution 2410, gagem na a maikkan ti 80,000 a pisos nga special risk allowance dagiti mangisursuro a makaptan ti covid-19 bayat ti pannakasayangkat ti face-to-face classes ditoy pagilian.
