LAOAG CITY – Inaprubaran ti kamara de representantes iti maikatlo ken maudi a pannakaibasa ti gakat a mangitantan ti December 2022 barangay ken Sangguniang Kabataan (SK) elections iti maysa a tawen.
Babaen iti House Bill 4673, kalikagum a maitantan ti barangay and SK polls iti umuna a lunes ti Disyembre 2023.
Naprubaran daytoy iti kamara babaen iti 264 nga affirmative votes, innem a negative vote ken tallo nga abstention.
Kaaduan kadagiti House members ti nangaprubar ti gakat iti laksid nga ipetpetteng ni Commission on Elections (Comelec) chairperson George Garcia a ti pannakaitantan ti barangay ken sk elections iti maysa a tawen ket mangitunda iti nayun a gastos para iti gobierno gapu ta kasapulan ti poll body a lukatan manen ti registration para kadagiti baro a botante.
Maysa kadagiti nagbutos ti “no” a ni House Deputy Minority Leader France Castro of ACT Teachers party-list ket patien na a ti nasao nga addang ket mangikkat iti boses dagiti Pilipino nga agpili ti kayat da a lider.
Kabayatanna, adda ti kapada a lungalong ti maad-adal iti Senate plenary ngem nakailanad ditoy a ti eleksyon ket maiyuswat iti maikadua a lunes ti Disyembre 2023.
Nu aprubaran ti senado ti nasao a gakat, agtataripnong ti bicameral conference committee ken isuda ti mangadal kadagiti provisions ti dua a lungalong.
