LAOAG CITY – Inrakurak ti Community Environment and Natural Resources Office a posible iti pannakaipatungpal ti pannakai-ban wenno pannakaipawil ti panagusar ti plastic bag ditoy siudad ti Laoag.
Inbatad ni Ms. Mylene Pascual, mangidadaulo iti nasao a pangopisinaan, daytoy nga addang ket magun-od babaen iti in-inot a pannakaisuro ken pannakaipaganetget kadagiti umili iti panangliklik ti panagusar ti plastic bag nangruna iti panagturong iti merkado publiko tapno makitienda.
Mainaig iti daytoy, kunana nga agtultuloy ti pananggutigotda kadagiti consumers nga agitugot kadagiti pagkargaanda kas kadagiti eco bag, bayong ken dadduma pay.
Inlawlawagna a babaen iti daytoy a wagas ket isu ti mangsanay kadakuada a mangkissay ti basura iti uneg ti pagtaenganda.
Kabayatanna, inpakaammo ti mangidadaulo ti Community Environment and Natural Resources Office a single-use plastic pay laeng iti agdama a linteg a maipatpatungpal wenno pannakaipawil a madoble ti pagsupotan dagiti magatang a produkto ditoy siudad kangrunaanna iti Laoag City Public Market and Commercial Complex.
