LAOAG CITY – Inlawlawag ni Sangguniang Panlalawigan Member Franklin Dante Respicio ti gakat nga inlungalong ni Sen. Imee Marcos mainaig iti ad-adda a pannakaitandudo ti Renewable Energy a maysa kadagiti gagem na ket maingato ti share a mapan iti lokal a gobyerno.
Kuna na nga iti biang ti Renewable Energy ket bassit ti maited nga insentibo kadagiti lokal a gobierno rason nga inlungalong ni Sen. Marcos ti Senate Bill 1030.
Segun kenni Respicio, babaen iti daytoy ket mapadakkel wenno maipangato ti share a mapan iti lokal a gobierno manipud iti Renewable Energy.
Inbatad na a ti masapulan wenno mapastrek ti renewable energy nga agop-operar ken imbes a maysa a porsiento ket agbalin a dua a porsiento ti maited a share iti lokal a gobyerno.
Inlawlawag ni Respicio a manipud iti dua a porsiento a share ket mabingay iti 40 a porsiento a mapan iti gobierno national idinto a ti 60 a porsiento ket mapan kadagiti Local Government Units.
Ti 60 a porsiento a mapan iti lokal a gobierno ket mabingay ken ti 40 a porsiento ket mapan iti probinsya, 30 a porsiento ket mapan iti munisipyo wenno ciudad ken ti nabati a 30 a porsiento ket mapan met iti barangay.
Malaksid iti daytoy, agbalin pay a mandatory kadagiti lokal a gobierno iti panangiyendorsar wenno panangipalubos ti pakaipatakderan dagiti renewable energy a proyekto.
