LAOAG CITY – Inaprubaranen ti kamara de representantes iti maikatlo ken maudi a pannakaibasa ti gakat a gagem na a papigsaen ti National Housing Authority (NHA) tapno ad-ado dagiti Pilipino ti maaddaan ti bukod a balay.
Pimmabor amin dagiti 188 nga agpanpanday linteg rason nga inaprubaran a dagus ti kamara de representantes ti House Bill (HB) No.10172 wenno ti National Housing Authority Act.
Ti House Bill 10172 ket nabukel manipod iti walo a gakat, ti House Bill Nos. 954, 1429, 2300, 2994, 6390, 8156 8758, ken 9258.
Inpayaan importansya ni Speaker Ferdinand Martin G. Romualdez ti kinapateg ti pannakapapigsa ti pabahay tapno maipababa ti kinarigat, mailungalong ti climate resilience, naur-urnus a salun-at ken panangitandudo ti socio cultural ken panagdur-as ti ekonomiya.
Iti babaen ti gakat ket kumpiyansa ni Speaker Romualdez a makaparnuay kadagiti kabarwanan ken alternatibo a solusyon tapno solusyonan ti panagkasapulan iti pagnaedan dagiti informal settler families, lower-income classes ken vulnerable sectors.
Ilunglungalong pay daytoy ti naur-urnus a wagas iti panaggatang ken panangiwanwan ti daga.
Iyalud-od pay ti gakat ti corporate term ti National Housing Authority ti 25 a tawen iti babaen ti panangiwanwan ti Department of Human Settlements and Urban Development (DHSUD).
Ti National Housing Authority ti agserserbi a central repository dagiti datos mainaig kadagiti balay a naipatakder iti asideg dagiti pagayusan ti danom, danger areas, government infrastructure project site ken dagiti lote a kukua ti gobierno Metro Manila.
Masapol nga agtungpal ti National Housing Authority iti probisyon ti Republic Act (RA) No. 10149, wenno “GOCC Governance Act of 2011”, kas maysa a government owned or controlled corporation (GOCC).
