LAOAG CITY – Nabara a nagdedebatean iti regular sesyon ti konseho ti ciudad ti Batac ti nailungalong a gakat para ti pannaka-amendar ti naipasa nga ordinansa idi pay tawen 1994.
Daytoy ket mainaig iti saanen a panagbayad dagiti senior citizens (SC) ken Persons with Disability (PWD) iti birth certificate ken clearance manipud PNP.
Kwinestyunaran dagiti sumagmamano a kameng ti konseho ti kayat ti nangisponsor ti nasao a gakat a ni Konsehal Gian Crisostomo a mangipatungpal a dagus ti daytoy.
Inpetteng ni Konsehal Bernard Marders a masapol a maipadalan nga umuna daytoy iti public hearing.
Innayon na a ti gakat ket maibilang a revenue ordinance ken possible a maapektaran ti mapastrek ti ciudad ti Batac.
Nupay kasta, inbatad ni Vice Mayor Windell Chua a saanen a kasapulan ti public hearing no di ket masapol nga iplastar da laeng ti gakat sakbay nga ipasa da ken naan-anay a maipatungpal.
Gapu iti daytoy, immanugot ni Crisostomo a maitantan pay laeng a maipasa ti inisponsoran na a gakat.
