LAOAG CITY – Saan a pinatgan ti Sang. Panlungsod ditoy ciudad ti Laoag ti kiddaw ti franchisee ti Laoag Sports Complex a mai-move ti pannakaisayangkat ti derby, gapu ta naduktalan a saan nga agbaybayad ti upa ken buwis ti franchisee a nangrugi pay idi bulan ti Hunyo.
Daytoy ti rason no apay a nag-priviledge speech ni Sang. Panlungsod Member Jason Perrera gapu ta patien na a daytoy nga inaramid ti galyeraan ket maka-irisgo iti trabaho dagiti inosente a mangmanged iti nadakamat a galyeraan.
Malaksid iti saan a mabaybayadan nga upa, buis ken dadduma pay a charges ti galyera ket naduktalan pay a nagoperar da idi Pebrero 15, 2024 nga awan ti special permit da.
Patien ni Perrera no kastoy ti agtultuloy nga ubraen ti galyera ket possible a marevoke ti prangkisa ti nadakamat a franchisee a ni Engr. Joeffrey Felipe.
Innayonna a ti panagoperar laeng koma ti galyera ket no mapatgan daytoy iti babaen ti linteg.
Naamuan a ti laeng nakailanad iti linteg a panagoperar ti galyera ket no holiday ken no aldaw ti Dominggo.
Gapu iti daytoy ket kalikagom ti Konsehal a maimbestigaran a nasayaat daytoy gapu ta rumrumuar nga umaboten iti nasurok a 350,000 a ribo a pisos dagiti masapol a bayadan ni Engineer Felipe.
Mainaig iti daytoy ket dagos met a nagpaayab ni Mayor Michael Marcos Keon ditoy ciudad kadagiti amin a miembro ti Sangguniang Panlungsod pakairamanan ni Bise Mayor Carlos Fariñas tapno mapagsasaritaan ken malawlawagan daytoy nga isyu.
