LAOAG CITY – Agtultuloy ti naun-uneg nga imbestigasyon dagiti kameng ti PNP-Batac seknan iti maipapagarop a panagkidnap a nakatiliwan dagiti uppat a babbai ken maysa a lalaki a suspek.
Segun kenni Police Major Mar Loiuse Bondoc, ti chief of police ti PNP-Batac, karaman kadagiti ammoen da ket ti pakabigbigan ti maysa kadagiti suspek a nakataray.
Ummuna iti daytoy, kunana nga idi Hunyo 2, ti target dagiti suspek ket ti agnagan ti Lorraine de Jesus nga agtawen ti 54 no sadinno ket naggapo iti maysa a bangko.
Inlawlawag na nga idi rimuar ni De Jesus ket adda ti nagpammarang kenkuana a kabagyan na nga agnagan ti “Eva” ken maipagarop a target na daytoy a mabudol babaen iti panangited na ti dolyar.
Nupay kasta, nagatap ni De Jesus gapo ta saan na met nga am-ammo ni “Eva” ken idi madlaw na a mabalin a mabudol isuna ket nagikkis rason a naala ti atensyon dagiti tattao kasta pay nga eksakto a lumabas dagiti pulis iti nadakamat a bangko.
Dagus a nagtaray dagiti suspek ngem kinamat dagiti pulis agingga a na-corner dagitoy iti asideg ti police station.
Mainaig iti daytoy, kunana ni Bondoc a saan nga inbaga dagiti suspek no sadinno ti pagnanaedan da ditoy probinsya gapo ta dagitoy ket aggapo iti Cavite, Manila ken Pampanga.
Dinakamat na nga inadmitir dagiti suspek a kastoy ti datin nga ar-aramiden da.
Kabyatanna, kuna ni Bondoc a mabalin a saan a karaman iti sindikato dagiti suspek gapo ta napyansaan kuman dagitoy ti sag-240 a ribo a pisos.
Iti agdama, nagtalinaed dagiti suspek iti kustudiyar ti BJMP iti nakadamat a ciudad.
