LAOAG CITY – Kinumpirmaran ti Department of the Interior and Local Government (DILG) a rinugianen dagiti otoridad ti panangbantay iti garaw ken kaadda ni Sen. Ronald “Bato” dela Rosa.
Daytoy ket basar iti Department of the Interior and Local Government uray saan pay a naiparuk-at ti arrest warrant manipud iti International Criminal Court (ICC) kontra ken ni dela Rosa.
Inbatad ni Department of the Interior and Local Government Undersecretary for Public Affairs and Communications Donnie Puno a nakasaganada iti aniaman a kaipapanan daytoy.
Kunana a nasaysayaat a maammoanda no sadinno a lugar ti ayan ni dela Rosa sakbay nga iparuk-at ti International Criminal Court ti warrant.
Maipalagip nga addan ti sumagmamano a lawas a saan a simrek iti Senado ni Sen. dela Rosa ngem adda dagiti nakakita kenkuana kadagiti innem a nagduduma a lugar ditoy pagilian kadagiti naglabas a tallo a lawas a posible a makinanaed kadagiti pagayamna babaen kadagiti nagduduma a luganna.
Inlawlawag ni Puno a saan met pay a maibilang a fugitive ni dela Rosa gapu ta awan pay ti warrant of arrest kontra kenkuana.
Mangnamnama ti Department of the Interior and Local Government a saan a mangipaay ti preferential treatment ti Philippine National Police ken ni dela Rosa uray daytoy ket dati a Philippine National Police Chief gapu ta adda ti responsibilidad dagiti pulis a nasken a suroten ti pammilin maiyallubog iti linteg.
