LAOAG CITY – Balligi a mabanbantayan ti Philippine Coast Guard (PCG) dagiti garaw ti 165-meter monster ship ti Chinese Coast Guard, CCG-5901 babaen iti teknolohia a Dark Vessel Detection ti Canada.
Segun ken ni Philippine Coast Guard Spokesperson for West Philippine Sea, Commodore Jay Tarriela, iti uneg ti sumurok dua nga aldaw a nagsaruno, ti barko ti Chinese Coast Guard ket nakasanglad iti asideg ti Escoda Shoal no sadino agtaltalinaed nga umas-asideg iti BRP Teresa Magbanua.
Inbatad ni Tarriela ti gidyat dagiti dua a lugan a pangbaybay ket awan pa ti 800 a yarda no sadino ti barko ti China ket nakaposision iti starboard beam ti Philippine Coast Guard vessel.
Kuna ni Tarriela nga idi Julio 1, 2024 ket timmalaw ti barko manipud iti Hainan ken simrek iti Exclusive Economic Zone (EEZ) ti Pilipinas iti simmaruno nga aldaw.
Idi Hulio 3, direkta a dimmalyasat daytoy iti Ayungin Shoal ken saan a nagbayag ket nagturong iti Panganiban Reef no sadino kalpasan ti sumagmamano nga oras, naminsan manen a na-detect ti barko nga agturong met ita iti Escoda Shoal.
Gapu iti daytoy, nangiruar ti radio challenge ti BRP Teresa Magbanua.
Sinaludsod ti Philippine Coast Guard ti intension ti barko ti China ket inpetteng daytoy a dumaldalyasat iti uneg ti Exclusive Economic Zone ti Pilipinas.
