LAOAG CITY – Naarestar ti maysa a gasoline boy kalpasan a naglabsing iti Election Gun Ban iti Sitio Baltao West, Brgy. Santiago iti ili ti Solsona.
Nabigbig ti suspek a ni Renz Feriol y Solomon, agtawen ti 22, naasawaan ken residente ti Brgy. Bagbag iti ili ti Solsona ken ti kaduana a ni John Ray Dela Cruz y Balaan, agtawen ti 19, estudiante ken residente ti Brgy. Aguitap, iti nasao met laeng nga ili.
Nabigbig met dagiti biktima nga isuda Anthony Domingo y Remigio, agtawen ti 21, awanan asawa, Delivery Boy; Mark Donel Domingo y Manuel, agtawen ti 27, addaan ti live in partner, mannalon, agpada a residente ti Brgy. Juan; maysa nga agtawen ti 17, estudiante; Mark Anthony Ralleca y Baradi, agtawen ti 33, Driver, naasawaan, agpada a residente ti Brgy. Santiago iti ili ti Solsona.
Segun ken ni P/Maj. Chris Anthony Sorsano, Hepe ti Solsona Municipal Police Station, adda ti saan a panagkikinnaawatan ti dua a grupo agingga a nagbinnara dagitoy.
Inbatadna nga inruar ni Renz ti paltogna ngem natnag ti magazine-na idinto a nagdinnanog ni Anthony ken Jhon Ray nga inanawa met ni Mark Donel.
Inlawlawagna a napan naganawa dagiti residente nga asideg iti lugar isu a napagsisina met laeng dagitoy.
Mainaig iti daytoy, narekobre ti kapulisan ti maysa a paltog a Cal 45.
Kabayatanna, nagtalinaed iti pagbalodan dagiti dua a suspek.
