LAOAG CITY – Dumanon iti P7 billion ti gatad a magastos para iti pannakapasayaat ken rehabilitasyon ti San Juanico Bridge iti baet ti panagamak mainaig iti kinatibker ti istruktura basar iti National Disaster Risk Reduction and Management Council (NDRRMC).
Iti maysa a resolusion, inrakurak ti ahensia nga aniaman a pannakaitantan iti pannakaiparuk-at ti pundo ket mangpakaro pay iti krisis wenno iti structural integrity ti rangtay.
Basar iti ahensia, mabalin nga agresulta dagiti restriksion iti rangtay ti agingga iti P600 million iti kada bulan a lugi iti ekonomia gapu ta adda ti 14 a ribu a lugluan ti dumaldalyasat iti kada aldaw.
Kunana a dagiti karaman iti naapektaran a sektor ket iti food ken fuel supply, panangipaay ti healthcare services, commercial distribution ken regional trade.
Maipalagip a naipatungpal ti limitasyon iti panagdalyasat dagiti lugan nga agdagsen ti tallo a tonelada laeng iti San Juanico Bridge a nangrugi idi Mayo 15 kalpasan a rimmuar iti assessment nga adda dagiti sumagmamano a problema iti istruktura ti rangtay.
Gapu iti restriksiyon, naisardeng ti panagdalyasat dagiti nadadagsen a cargo vehicles a nangitunda ti pannakaitantan ti panagbiahe kadagiti taraon, medisina, dagiti produkto agrikultura, construction materials ken dadduma pay a napapateg a commodities iti Eastern Visayas.
