LAOAG CITY – Inpadanon ni Mr. Antonio Manegdeg, agtawen ti 57 ken Good Conduct Time Allowance (GCTA) Surrenderee babaen ti Bombo Radyo Laoag ti agdama nga estado da iti New Bilibid Prison (NBP).
Ummuna iti daytoy, kas panangsurot iti pammalin ni Presidente Rodrigo Duterte nga amin a nawaya-wayaan manipud 2013 agingga iti 2019 babaen ti GCTA ket sumuko ken ipresentar da ti bagbagi da iti nasao a pagbaludan.
Segun kenni Manegdeg, tapno mapaneknekan a naiserbi nan ti 28 a tawen a sentensya na iti kaso a murder ken saan a karaman kadagiti saan a rumbeng kuma a mapaluspusan ket simmuko.
Nupay kasta, kunana nga adda ti nasurok dua a bulan ti napalabas ngem awan pay ti addang ti Bureau of Corrections (BOC) mainaig kadakuada a simmuko.
Inlawlawag na a dimmalan da iti husto a proseso ken kumpleto ti release papers na ken inpresentar nan iti document section ti nasao nga ahensya ngem agpapan ita ket adda da pay laeng iti pagbaludan.
Kunana a narigat ti estado da a nasurok nga uppat a gasot nga agdama nga adda iti pagbalodan gapo ta dagiti dadduma ket matmaturog pay iti semento.
Patyen ni Manegdeg nga adda ti nailaok kadakuada a saan kuma pay laeng a rumbeng a mawaya-wayaan.
