LAOAG CITY – Mangiyuswat ti Gender and Development Office Pregnancy Symposium iti ili ti Solsona.
Segun ken ni Mrs. Janette London, ti mangidadaulo iti nasao a pangopisinaan, daytoy ket kalpasan a nakaawatda ti imbitasion manipod iti nadakamat nga ili.
Inbatadna maiyuswat ti nasao nga aktibidad kadagiti pagadalan ti sekondaria tapno maipakaammo dagiti maseknan nga agad-adal ti rumbeng a maammoanda maipanggep iti daytoy.
Kunana nga isuda mismo ti agbalin nga Speaker ken manamnama pay nga agbalin a bisitada ni Dr. Rickson Balalio, ti mangidadaulo iti Provincial Health Office.
Innayonna a daytoy nga aktibidad ket pagbibinnuligan ti Municipal Population Program Office, Provincial Health Office ken Gender and Development Office.
Naammoan a manamnama a maisayangkat ti nasao nga aktibidad inton Mayo 20 agingga 24 .
Maipalagip a dumanonen iti 122 ti nairekord ti Gender and Development Office a bilang dagiti agtutubo a nasapa a nagsikog ditoy probinsia iti umuna a kuarter ti tawen 2024 no sadino ti kaubingan ket agtawen ti 15.
