LAOAG CITY – Inpetteng ni Mrs. Kharen Vidad, ti General Parent Teacher Association Presidente iti Shamrock Elementary School ditoy siudad ti Laoag nga awan ti pannakaobligar dagiti nagannak a mangited ti kontribusyon iti pondo tapno mapalawa ti naestablisar nga i-learn center iti nasao a pagadalan.
Segun ken ni Vidad, awan a pulos ti gundaway a nadakamat na kadagiti pada na a nagannak a masapol ti agbayad para iti pannakaipalawa ti center.
Inlawlawag na a gapu iti panagballigi ti launching itay napan a lawas ket arig a nakarit ti asosasyon da a nagannak gapu ta isuda ti naggapoan ti inisyitibo.
Kuna na a gapu iti daytoy ket dinawat na ti kapanunotan dagiti pada na nga opisyal tapno makaukkon ti pondo ken maitultuloy a mapadur-as wenno mapalawa ti i-learn center.
Inbatad na a sumagmamano kadagiti nailungalong nga addang tapno makaukkon ti ket fund raising ngem maadal pay laeng dagitoy ken awan pay ti naipatungpal.
Inpetteng na nga awan ti masingir kadagiti nagannak ngem ketdi agkamang da kadagiti stakeholders tapno maitultuloy ti pannakapapintas ti center.
Mainaig iti daytoy, inpakaammo ni Vidad nga amin a learning materials ken gadget iti nasao a center ket naggapo iti DepEd Laoag.
Ti i-learn center ket isu met ti kaunaan ditoy siudad ti Laoag ken iti probinsya nga Ilocos Norte.
Kabayatanna, immunan nga adda ti naawat a report ti Bombo Radyo Laoag seknan ti maipagarup a panagbayad dagiti nagannak para iti ad-adda a pannakapapintas ti nasao a center.
