LAOAG CITY – Ngimato iti 20.55% ti generated income iti Laoag City General Hospital ita a tawen 2024 no ikumpara iti napalabas a tawen.
Basar iti record ti Laoag City General Hospital, agarup P60-M ti total collection ti ospital manipud idi Enero 1 agingga ita a bulan ti Disiembre no idasig iti generated income a nasurok P49-M.
Segun ken ni Dr. Marsha Lou Wapan, Officer-In-Charge ti Laoag City General Hospital, daytoy ket gapu iti panagado dagiti baro nga equipment ken serbisio ti nasao nga ospital rason a naruay dagiti patiente a mapan nga agpataming.
Inpakaamona nga addaan ti nadakamat nga ospital ti modern CT-scan ken dagiti dadduma pay a kagamitan a naggapo iti lockal a gobierno ditoy cuidad ken Department of Health kas kuma iti X-Ray, ultrasound ken nagduduma pay a medical equipments.
Inabatdana a napapintasen dagiti nagduduma a pasilidad kas iti laboratory, dialysis area, dagiti kwarto, ambulansia ken ti panangipaay ti al-alisto a serbisio.
Kabayatanna, mangnamnama ni Wapan manayunan pay ti collection ti Laoag City General Hospital iti daytoy a bulan ti Disiembre ken pakairamanan ti pannakanayon kadagiti health personnel para iti napinpintas a serbio a maipaay kadagiti patiente.
