LAOAG CITY – Napasamak ti maikapat a panagbettak ti Kilauea volcano iti alas 3:55 ti parabangon oras idiay Hilo, Big Island, Hawaii.
Daytoy ti inpakaammo ni Bombo International Correspondent Manny Pascua manipud idiay Hawaii.
Kuna na nga immabot ti nasurok 8,000 a kadapan ti kangato ti inabot ti asok ken dapo, basar iti US Geological Survey ken NASA.
Segun kenni Pascua, kimmaru ti pannakaapektar ti Kau district a lugar dagiti adu a Pilipino gapu iti dapo manipud ti bulkan.
Inbatad nga nga adda dagiti aguy-uyek a Pilipino ngem nupay kasta awan dagiti naimaldit a pimmusay wenno kritkal ti kasasaad na.
Iti mainaig a damag
Naiget a banbantayan dagiti otoridad ti Puna Goethermal Power Plant gapu iti umas-asideg a lava iti binisinidad ti nasao a planta.
Daytoy ti inbatad ni Bombo International Correspondent Manny Pascua manipud idiay Hilo, Big Island, Hawaii.
Kuna na a maysan a pasdek ti linamot ti lava iti asideg ti nasao a planta.
Inbatad ni Pascua a saan a nakaturog dagiti Pilipino iti Puna District gapu ti kinaadda dagiti eroplano ken helicopter a mangbanbantay ti Geothermal Plant.
Kabayatanna, naapektaranen ti sulfur dioxide a parparnuayen ti lava, dagiti mula a papaya, orchid ken sabsabali pay idiay Puna District.
Innayon ni Pascua nga ikumpirmar na pay ti dimmanon kenkuana nga impormasyon nga adda iti taga ili ti Bacarra ken Sarrat iti nadadael ti Papaya farm na.
