LAOAG CITY – Inadmitir ti Saudi Ministry of Foreign Affairs iti Riyadh a saan nga ingkankano ti Germany ti panangipaayda ti ballaag iti suspek a dimmungpar iti Christmas market iti Magdeburg.
Basar iti nasao nga ahensia nga innikkadan ti impormasion ti German government pakairamanan ti intelligence agencies ngem saanda nga inkaskaso.
Maipalagip a ti suspek a ni Taleb al-Abdulmohsen ket naarestar kalpasan ti panangdungparna iti Christmas Market a makumikom dagiti naruay a tattao iti panaggatang a nangitunda ti pannakatay dagiti lima nga indibidual ken sumurok 60 a dadduma pay ti nasugatan.
Basar iti impormasion ket naikkan ti asylum iti Germany idi 2016 ni Taleb al-Abdulmohsen ken kalpasan ti sangapulo a tawen ket nagbalin a residente daytoyen iti Germany.
Tinallikodanna ti panagbalinna kas maysa nga Islam ken ibilangna ti bagina kas maysa a bannuar iti inaramidna a desision.
Adda ti inaramidna a websites a tultulunganna dagiti babbai idiay Saudi a tumalaw iti pagilianda.
Iti agdama, nagtalinaed a nakabalod ti suspek ken am-ammoenda pay laeng ti motibo iti napasamak nga insidente.
