LAOAG CITY – Nagun-od ti Gilas Pilipinas ti balitok a medalya iti 19th Asian Games kalpasan nga inabakda ti Jordan iti iskor a 70-60 idiay Hangzhou, China.
Daytoy ti umuna a basketball gold medal para iti Pilipinas iti Asian Games sipud idi nangabak ti squad nga indauluan ti legendary a ni Caloy Loyzaga idiay Jakarta, Indonesia idi 1962 wenno kalpasan iti uneg ti 61 a tawen, ti maudi kadagiti uppat a nagsasaruno a gold medals para iti pagilian.
Ni Justin Brownlee ti bida iti panagballigi ti Gilas babaen ti 20 points, 10 rebounds ken 5 assists idinto a ni Ange Kouame ket addaan iti 14 points ken 11 rebounds para iti Pilipinas.
Iti rugi ti ay-ayam, agresibo ti Gilas no sadino a dagus a naparmekda ti Jordan iti 11-5 agingga a naipababa ken naitabla iti 29 all babaen ti star player ti Jordan a ni Rondae Hollis-Jefferson iti panaglippas ti first half.
Iti iseserrekna iti maikatlo a quarter, nagtitinnulong ti Gilas a nangipangato manen babaen kada Scottie Thompson, Kevin Alas, Calvin Oftana ken Japeth Aguilar.
Maipalagip nga inabak ti Jordan ti Gilas iti iskor nga 87-62 iti umuna a matchup-da idi napan a lawas.
Kabayatanna, daytoy ti umuna a final para iti Philippine basketball team sipud idi 1990. Ti maudi a team a nakadanon iti daytoy nga adayo ket sinanay met ti agdama a Ginebra head coach a ni Robert Jaworski, a nangidaulo iti umuna nga all-Philippine Basketball Association national team agingga iti silver medal idiay Beijing, China.
