LAOAG CITY – Opisialen a makaay-ayam iti FIBA Asia Cup 2025 ti Gilas Pilipinas a maiyuswat idiay Saudi Arabia inton bulan ti Agosto inton sumaruno a tawen.
Daytoy ket kalpasan nga inabak ti New Zealand ti Chinese Taipei iti iskor nga 81-64 iti home court ti New Zealand.
Kalpasan ti pannakaabak ti Taiwan ket siguradon ti puesto ti Pilipinas iti Top Two iti Group B nga isu ti kasapulan tapno makastrek iti torneo inton Agosto.
Adda ti uppat a panangabak ken awan pay ti abak ti Gilas idi abakenda ti Hong Kong iti iskor a 93-54 idi Domingo iti Mall of Asia Arena.
Nakastrek pay ti New Zealand Tall Blacks idi abakenda ti Chinese Taipei ken magun-od ti rekord a 3-1.
Naammoan nga inton sumaruno a tawen a torneo ket gagem ti Gilas a ma-improve ti maika-siam a puesto idi FIBA Asia Cup idiay Jakarta idi 2022.
Gandaten ti Gilas Pilipinas nga agawen ti korona iti Australia nga isu ti defending Asia Cup champion.
Karaman pay a nakastrek iti FIBA Asia Cup ti Japan ken ti Saudi Arabia kas host country.
