LAOAG CITY – Umabot ti agarop sangagasut a pasahero ken naruay a lugan ti naistranded iti kabanbantayan a paset ti Sta. Praxedes, Cagayan gapu kadagiti napasamak a landslides a gubuay ti awan sardeng a panagtudtudo na iti nadakamat a probinsya.
Segun ken ni Mr. Boy Anapig, Inspector ti Florida Bus Line, agarop alas-singko idi malem a naistranded da iti lugar.
Kuna na, adda ti panagamak da it possible a panaggedday met ti daga nga ayan da iti agdama.
Inbatad pay ni Anapig nga awanen ti kanen ken inumen da a danom isut gapuna nga an-anusan da lattan ti tudo nga agayos iti bantay.
Gapu iti daytoy, immapela ti tulong ni Anapig kadagiti opisyal iti ili ti Sta. Praxedes ken uray iti Ilocos Norte gapu ta agamak da a possible a kumaro ti sitwasyon a mabalin a pakaisagmakan da amin.
Kabayatanna, inpakaammo met ni Father Dennis Tambio,
taga Pasuquin, Ilocos Norte ngem agdama a parish priest idiay Aparri, Cagayan a nakaad-adon dagiti nalayos iti lugar.
Kuna na a ti kangrunaan a nalayos ket dagiti pagtatalunan ken saanen nga agbalin dagiti bunubon isut gapuna nga agamak ken maproblemaan dagiti mannalon iti nadakamat a lugar.
