LAOAG CITY – Makumikum dagiti rescuers iti panagibakwit da kadagiti residente nga apektado ti nalawa a layus a gubuay ti panagtudtudo na ti napigsa iti sumagmamano a paset ti Bangladesh ken northeast India.
Gapu iti agtultuloy a panagtudtudo na ti napigsa ket ngimmato ti lebel ti danom kadagiti karayan a nangitunda ti nalawa a layos.
Nasurok a 300 a tattao manipod iti southeastern Bangladesh ti kangrunaan a naapektaran ti layos ken ginasut a balay ti tinupar ti danom.
Basar iti report, adda ti 11 a tattao a kumpirmado a natay iti estado ti Tripura iti India idinto a dua ti pimmusay iti Bangladesh.
Iti paset ti Tripura, nasurok nga 64 ribo a tattao ti agkasapulan ti pagnaedan.
