LAOAG CITY – Nakagun-od ti world record ti ginasut nga elementary ken high school students idiay Hong Kong kalpasan a nag-recycle dagitoy ti rugit ti panda tapno aramiden a papel.
Kinumpirmaran ti records keeping organization a Guinness World Record a ti 369 nga estudiante idiay Hong Kong ti baro nga akin-iggem ti titulo a “Largest Animal Feces Paper Making Lesson.”
Daytoy ket kalpasan a naggigiddan dagitoy a nagaramid ti papel manipud iti rugit ti panda.
Naiyuswat ti nasao a record breaking attempt iti Ocean Park, maysa a theme park, zoo ken oceanarium.
Ti maysa nga adult panda ket kabaelanna nga agrugit ti 10 a kilo iti maysa nga aldaw.
Gapu ta bamboo laeng ti kankanen dagiti panda, napintas nga aramiden ti rugit daytoy tapno makaaramid ti papel gapu ta matuntunaw iti buksit ti fructose ken maisinada ti fibers daytoy.
Idiay China, sumagmamano a tawenen nga agus-usar ti panda feces dagiti sumagmamano a kompania iti nasao a pagilian tapno aramiden daytoy a toilet paper.
Basar iti event organizer, ti gagemda iti event ket maitandudo kadagiti agtutubo para iti environmental awareness.
