LAOAG CITY – Pinaramanan ti Barangay Ginebra ti beterano a kapadasanna iti panagay-ayam kontra iti Meralco Bolts iti iskor a 91-87 iti maudi nga ay-ayam ti eliminations ti PBA 49th Season Commissioner’s Cup iti Araneta Coliseum.
Addaan ti walo a panangabak ken uppat a pannakaabak ti Gins no sadinno a tablada ti Converge iti maikatlo a puesto.
Ti Bolts ket addaan ti pito a panangabak ken uppat a pannakaabak no sadinno nga addaanda pay ti maysa pay nga ay-ayam kontra iti Magnolia.
Bimmida iti panagballigi ti Ginebra ni RJ Abarrientos a nakairekord ti 17 points idinto nga addaan ti 15 points ni Justin Brownlee ken 13 points ni Stephen Holt.
Nagbalin a dakkel a karit met iti Bolts ti ay-ayam gapu iti saan a panagay-ayam ti import-da a ni Akil Mitchell gapu iti back spasm.
Inadmitir ni Ginebra coach Tim Cone nga agsagsaganan ti koponan para iti playoffs.
Saan met nga immanay ti 15 points ni CJ Cansino ken 13 points, 13 rebounds met ni Raymond Almazan para iti Bolts.
