LAOAG CITY – Nagpanawagan ni Senador Win Gatchalian ti dagus a pannakapagbalin a linteg ti “GINHAWA” wenno ti Granting Increase in Take-Home Pay for All Working Filipinos Act tapno maipangato ti mapastrek dagiti adda iti middle class.
Iti statement, inbatad ni Gatchalian a kasapulan a tulungan met ti gobierno ti middle class iti panagngato ti presyo dagiti kangrunaan a magatgatang nga epekto ti panagngato ti presyo dagiti produkto a petrolyo iti world market.
Inlawlawag ni Gatchalian a gagem ti GINHAWA Bill a maipangato ti take-home pay ti middle class iti babaen ti pannakaipangato ti income tax exemption threshold iti P400,000 ti kada tawen manipod iti P250,000.
Kuna pay ti Senador a mangipaay daytoy ti dakkel a pakalag-anan para kadagiti mangmangged a Pilipino nga adda iti middle class.
Gagem pay ti gakat nga ipangato ti limitasyon ti tax-free bonuses iti P150,000 manipod iti agdama a P90,000.
