LAOAG CITY – Saan pay a makitkita ti national security adviser ti Israel a malpasen ti giyera iti Gaza gapu ta mabalin nga agpaot pay agingga nga agngudo ita a tawen.
Iti maysa nga interview, inbatad ni Tzachi Hanegbi a namnamaen da nga agtultuloy ti riribok iti Gaza agingga iti sumaruno a pito a bolan tapno naan-anay a madadael ti kabaelan ti Hamas ken ti grupo a Palestinian Islamic Jihad.
Dinepensaan na met ti military operation kontra iti Hamas iti Rafah a nagbalinen a pagtarayan dagiti sibilyan tapno maisalakan da ti bukod da a bagi tunggal adda ti mapasamak a gubat iti Gaza.
Daytoy ket iti baet a inmandar kadakuada ti International Court of Justice nga isardeng dan ti panagatake iti Rafah.
Mainaig iti daytoy, inrakurak met ti dadduma a pagilian, pakairamanan ti Ehipto ti pannakaalarma da iti iyus-uswat nga operasyon ti Israel iti Rafah gapu ta pangta iti napagtutulagan a pannakaisaknap ti kapia iti rehiyon.
Iti kaudian a datos ket addan ti nasurok a 36 a tattao ti natay iti Gaza gapu iti giyera iti nagbaetan ti Israel ken Hamas.
