LAOAG CITY – Naragsak nga inpublikar ti aktres a ni Glaiza de Castro a tallo a bolanen a masikog iti umuna nga anak da iti asawa na a ni David Rainey.
Inbatad ni Glaiza a dakkel ti panagyaman na gapu ta kinabaelan na ti sensitibo a first trimester ti panagsikog na aglalo ket saan nga alisto dagiti nagdalanan na.
Segun kenkuana, ado dagiti nakasarisarita na a babbai ken nagsaludsudan na maipanggep iti umuna a gundaway a panagbalin nga ina.
Inrakurak na a makunana a saan a magatadan ti panagbalin nga ina.
Naglayos met a dagus ti pangablaaw manipod kadagiti celebrity friends ni Glaiza, kas kada Angelica Panganiban, Mikael Daez, Rayver Cruz, Alessandra de Rossi ken dadduma pay.
Maipalagip nga immuna a nagkasar da Glaiza ken David idi October 2021 iti Northern Ireland, United Kingdom, ken inulit da ti nagkasar ditoy Pilipinas idi Enero 2023.
