LAOAG CITY – Inlawlawag ni Gob. Matthew Marcos Manotoc a naberipikar a naimbag ti naisubmitir a datos para iti Barangay Incentivization Program.
Daytoy ket kalpasan a nangrugin ti pannakaibunong ti insentibo kas gunguna dagiti Barangay a nagballigi iti Barangay Incentivization Program iti ili ti San Nicolas. Segun kenkuana, ti naipaay nga insentibo kadagiti barangay ket nayon a pundo ti barangay nga usarenda a paggatang kadagiti kasapulan ti barangay iti laban kontra iti COVID-19.
Kunana a natingiting ken naarisit a naimbag no pudpudno dagiti naited a bilang wenno saan a masabotahe ti maisaysayangkat a “tracing” ken “testing” ditoy probinsia kadagiti 559 a Barangay ditoy Ilocos Norte.
Inbatadna a naiget pay a natingiting no saan a bigla a nagsuek dagiti naipadalan iti “antigen” ken “RT PCR test” a mangipamatmat iti panangkamkamat dagiti maseknan iti maipaay nga insentibo.
Maipalagip a basar iti rakurak ti gobernador itay kallabes, dagiti makaipababa iti kategoria ti naapektaran iti lugarda manipud iti nalabbaga wenno “very high spread” wenno nakaad-adu ti naapektaran pakairamanan ti pink wenno rosas wenno “high spread” wenno adu a naapektaran ket mapagbalin a gray wenno maris dapo wenno “low spread wenno bassit ti naapektaran pakairamanan dagiti makapagtalinaed a gray ti kategoriada ket maipaayan ti sangagasut duapulo ribu a pisos.
Kunana a dagiti adda iti kategoria ti blue wenno asul a kaibatugan ti “moderate spread” wenno kalalainganna a kaadu dagiti naapektaran kasta metten ti manipod iti nalabbaga ket mapagbalinda a blue ti kategoriada ket maipaayanda ti innem a pulo ribu a pisos.
Inrakurakna a maikkan met ti tallopulo ribu a pisos ti makaipababa ti kategoriada manipod iti pink ket agbalin nga asul idinto a ti makapagtalinaed ti kategoriada iti asul ket maipaayan ti sangapulo ket lima ribu a pisos.
