LAOAG CITY – Naiget ti panangsuporta ni Gob. Matthew Marcos Manotoc iti pannakausar ti eGov PH nga inrubuat ti Department of Information and Communications Technology iti Fort Ilocandia Resort Hotel ditot probinsia.
Segun kenkuana, in-download na ti nasao nga application sumagmamano a bulan sakbay a nairubuat ditoy probinsia babaen iti Department of Information and Communications Technology.
Mainaig iti daytoy, ibilangna ti nasao nga app a world class, alisto nga usaren, user friendly, integrated, komprehensibo ken simple.
Ginutigot na ti tunggal maysa kangrunaanna kadagiti mayor ditoy probinsia a mangi-download iti nasao nga app.
Imbatadna a masapul nga ag-digitalize ti probinsia agsipud ta maysa daytoy kadagiti kangrunaan nga itantandudu ni Pres. Ferdinand. Marcos Jr.
Kunana a gagem ti presidente iti panagbalin a transparent ken kankanayon nga adda dagiti serbisio ti gobierno.
Impalgak ni Gob. Marcos Manotoc a kalikagumna a masigurado a maipatungpal ti panagusar ti eGov PH ditoy probinsia.
Mangnamanama ken masirsirmatana nga agbalin ti Ilocos Norte a “tech hub” iti masangoanan nangnangruna iti amianan a Luzon.
Ginutigotna ti Department of Information and Communications Technology a tumulong iti Ilocos Norte a mangisigurado a maiyestablisar ti nasao nga application ditoy probinsia.
Impalgakna nga umuna a mabalin a maidiaya iti eGov PH ket ti panangala ti business permit ken maikadua ti panagbayad ti buis.
Innayonna a kaipapanan daytoy a saan laeng a lumaka ti panangala ti business permit ngem dakkel a makatulong a mangipangato iti koleksion dagiti Local Government Units.
