LAOAG CITY – Naiget a naglikudan ni Mr. Jerry Valdez, ti gobernador iti Ilocos Norte Provincial Jail (INPJ) ditoy probinsya dagiti alegasyon kontra iti nasao a pagbaludan.
Daytoy ket mainaig iti maipagarop a pannaka-kolkolektar ti kontribusyon manipod kadagiti balud tapno adda ti maigatang nga hose ken semento para kadagiti proyekto ti nasao a pagbaludan.
Inpetteng ni Valdez a saanda a nagdawdawat ti kwarta kadagiti pada da a balud gapu ta ammoda ti rigat iti panagbiag iti uneg ti pagbaludan.
Innayon na nga ado dagiti naayat a tumultulong kadakuada iti ruwar ken isuda ti mangmangted ti pondo nga usaren da para kadagiti isaysayangkat da a proyekto iti uneg ti pagbaludan.
Mamati ni Valdez a dagiti nagiparparuk-at iti isyu kontra iti nasao a pagbaludan ket dagiti saan a pabor iti napintas a liderato ni Jailwarden Benilda Sadian.
Inpalagip pay ni Valdez a no nabunga ti maysa a kayo ket ado ti mangbanat.
