LAOAG CITY – Ad-adalen ti gobierno ti panangted iti cash aid kadagiti minimum wage earner, middle class, ken dagiti kameng ti gobierno a naapektaran iti pannakaipangato ti presio dagiti produkto a petrolyo.
Segun kenni Palace Press Officer Claire Castro, nakadepende iti kabaelan ti pondo ti gobierno no maipatungpal ti pannakaipaay ti nasao a tulong-pinansial.
Inlawlawag ti Malakanyang nga ad-adda a natutukan ti transport sector gapu ta isuda ti direkta a naapektaran ken kangrunaan nga agkasapulan iti ayuda.
Innayon ni Castro a kalikagom ni Presidente Ferdinand Marcos Jr. a mapagbalin a balanse dagiti addang tapno saan a dagus a ngumina ti plete ken makagiddan ti kaadoan.
Iti agdama, kuna ni Castro nga adda dagiti maipatpatungpal nga addang tapno maalay-ayan no saan man a maliklikan ti epekto ti krisis, agraman ti libre a panaglugan ken diskwento iti plete iti LRT ken MRT, a pakainutan dagiti mangmangged ken middle class.
