LAOAG CITY – Nagballaag ni Defense Secretary Gilberto Teodoro Jr. a tiliwen dagiti hoarders ken price manipulators a manggungundaway kadagiti konsyumer ita nga agsagsaganan ti gobierno iti panagserrek ti La Niña phenomenon.
Inbatad ni Teodoro a nakasaganada a mangipaay ti suporta kadagiti ahensia iti price monitoring dagiti kangrunaan a magatgatang ken kasapulan.
Inbatadna kas Chairperson ti Presidential Task Force on El Niño iti pananggundaway ti presio ken panangsungbat kadagiti hoarders ket karaman kadagiti solusion ken prayoridad ti gobierno.
Aniaman a suporta ti kasapulan ti Department of Trade and Industry ken Department of Agriculture ket nakasaganada nga akomodaren dagitoy.
Inpetteng ti sekretario a naiget a kasapulan a malappedan ti panangina ti presio dagiti kangrunaan a magatgatang iti merkado tapno protektaran dagiti konsyumer kontra kadagiti managgundaway a negosiante iti panawen a mapaspasaran ti La Niña ditoy pagilian.
