LAOAG CITY – Inkari ni Presidente Ferdinand R. Marcos Jr. nga agtultuloy ti pannakikoordinar ti gobierno kadagiti pagilian nga agaw-awat kadagiti overseas Filipino workers (OFWs) tapno masigurado ti kinatalged ken makatao a kondisyon iti trabaho.
Iti panagbitla na iti isasango na ti Filipino community idiay Osaka, Japan, inbatad ti Presidente nga ar-ramiden amin ti gobierno na tapno agbalin a naurnus ti proseso ti pannakaipaay ti trabaho ken deployment dagiti mangmangged a Pilipino iti sabali a pagilian.
Innayon na nga adda met agur-uray a napipintas nga oportunidad para kadagiti Overseas Filipino Workers a kayat nan ti agawid ditoy Pilipinas.
Inpakaammo ni Presidente Marcos nga agtultuloy ti panangipatungpal ti gobierno kadagiti programa ken serbisyo para iti pagsayaatan dagiti Overseas Filipino Workers.
Mainaig iti daytoy, dinayaw ni Marcos ti napateg a papel dagiti agtutubo a Filipino-Japanese iti pannakapatalged ti relasyon ti Pilipinas ken Japan.
Agtalek ti presidente nga ad-adda pay nga umuneg ti kooperasyon ken panagpagayam ti dua a pagilian kadagiti sumarsaruno a tawen.
Maipalagip a nagturong ni Presidente Marcos idiay Osaka para iti maysa a working visit kalpasan nga inimbitaran ni Japanese Prime Minister Ishiba Shigeru tapno agatendar iti World Expo 2025 ken bisitaen ti Philippine Pavilion.
