LAOAG CITY – Kiniddaw ti gobierno lokal ditoy ciudad ti Laoag iti Department of Education a mangestablisar ti nayon a parkingan kadagiti pagadalan.
Daytoy ket kalpasan a naobserbaran ti road clearing team ti nakaad-ado a motorista a nakaparking iti igid ti kalsada.
Mainaig iti daytoy, inpasigurado met ti Department of Education nga ikkanda ti importansya daytoy a kiddaw ti gobierno lokal ditoy ciudad.
Kabayatanna, indasar ni Konsehal Jeff Fariñas ti panagirot ti trapiko iti castro avenue partikular iti Kids College.
Basar kenni Fariñas, nagsurat ti principal kenkuana ken inpakaammo na a kanayon nga adda ti mapan a personel ti traffic division ken kalikagom ti pagadalan a mapawilan koma dagiti truck a dumalyasat iti lugar.
Nupay kasta, inbalakad ti konsehal nga imbes a pawilan da dagiti truck a dumalyasat iti lugar ket mausar lattan a pagparkingan ti bakante a lote iti likud ti nasao a pagadalan.
Kabayatanna, nakikoordinar metten ti konsehal iti kapitan iti Brgy. 12 ditoy ciudad tapnu makasarita ti akin-lote tapnu ipakada a mapagbalin paylaeng a parkingan.
