LAOAG CITY – Inbatad ni dati a senador Panfilo Lacson nga obligasyon paylaeng ti Pilipinas ti mangipaay ti suporta ken ni dati a Presidente Rodrigo Duterte kas maysa a Pilipino a mausig iti International Criminal Court (ICC) nga adda iti sabali a pagilian.
Iti statement ni Lacson, kuna na a malaksid iti panagbalin a dati a presidente ni Duterte, daytoy ket maysa a Pilipino a sumango iti trial iti international court.
Inpetteng na a saan koma a liplipatan ti gobierno ti obligasyon na, kas maysa a pagalagadan a mangipaay suporta kadagiti Pilipino a kas iti kanayun nga ar-aramiden, uray kadagiti nasentensyaanen ken sumangsango iti dusa a patay iti ruwar ti pagilian.
Inaramid daytoy ni Lacson kalpasan ti pannakaarestar ken pannakaikabil idiay Netherland ni Duterte tapno usigen iti International Criminal Court iti kaso a crimes against humanity.
