LAOAG CITY – Inpasigurado ni Gov. Cecilia Araneta-Marcos nga ikarigatan ti gobierno probinsial a tulungan dagiti umili kabayatan ti mapaspasaran a krisis gapu ti kinangina ti krudo iti “world market”.
Daytoy ti inbatad ti gobernador kalpasan a napasaran ti kadakkelan a nagngatoan ti presyo ti nasao a produkto sipud ginubat ti America ken Israel ti Iran sumagmamano pay laeng nga aldaw ti napalabas.
Segun kenkuana, uray ti gobierno nasional ket ad-adalen da no ania ti aramiden da tapno maalay-ayan ti rigat a bakbaklayen dagiti umili iti agdama.
Kunana nga iyur-uray ti probinsia ti ania man nga ipatungpal ti gobierno nasional gapu ta sidadaan da a mangipatungpal.
Nupay kasta, inlawlawagna a naipagagangayen ti probinsia ti panangipapaay iti uray sangkabassit a tulong kadagiti umili a kangrunaan a maapektaran iti panagngato ti presyo dagiti produkto a petrolyo kas kadagiti driver ti pampubliko a transportasyon ken dagiti traysikelan babaen ti Metro Ilocos Norte Council (MINC).
Inbatad na anakiddaw metten kadagiti amin a pangopisinaan ti saanda a panangipangato ti thermostat ti aircon tapno saan unay nga aggastar ti kuryente.
Innayon na nga aramiden da amin a kabaelan da a tapno makatulong a mangipababa ti makonsumo nga enerhia.
Patien ti gobernador a kabaelan ti Ilocos Norte a labanan ti mapaspasaran a problema iti agdama a kas iti pannakabael a nanglaban iti pandemia a ginubuay ti COVID 19.
