LAOAG CITY – Makidanggay ti gobierno probinsyal iti panangrambak ti National Hospital Week ita a lawas.
Segun ken ni Sang Panlalawigan member Medeldorf Gaoat, chairman ti committee on health ditoy probinsya, makikammayet ti gobierno probinsial titi Mariano Marcos Memorial Hospital and Medical Center mga idadauloan ni Dr. Ma. Lourdes Otaysa kadagiti aktibidad para iti National Hospital Week.
Imbatadna a narugian dagiti maisayangkat nga aktibidad iti babaen ti panagzumba iti sango ti kapitolio probinsial a nakipartisiparan dagiti agpapaay iti nadakamat nga ospital.
Inlawlawagna a gagem daytoy a maitandudu ti dakkel a maitulong ti panag-ehersisyo iti pannakatagiben ti salun-at.
Inbunannag ni Gaoat a malaksid iti nasao nga aktibidad ket adda pay ti iyuswat nga exhibit ti Mariano Marcos Memorial Hospital and Medical Center iti Robinsons Mall ti ili a San Nicolas.
Kunana a ditoy a makita dagiti nagduduma a serbisyo nga ididiaya ti nadakamat nga ospital para kadagiti umili.
Innayon na a malaksid iti Mariano Marcos Memorial Hospital and Medical Center ket makibinnulig pay dagiti ospital ti probinsia a pakairamanan ti Gov. Roque B. Ablan Sr. Memorial Hospital ken dagiti nagduduma nga ahensia a mangisayangkat kadagiti programa para iti pannakatagiben ti salun-at dagiti umili.
