LAOAG CITY – Pursigido ti gobierno probinsial a mangipatungpal ti direkta a flight” iti Laoag International Airport ken kadagiti kabangibang a pagilian pakairamanan ti pannakaisubli ti direct flight ti Honolulu, Hawaii agingga iti Laoag International Airport ken vise versa.
Segun ken ni Governor Cecilia Araneta-Marcos, karaman kadagiti pakaisaysayangkatan ti koordinasyon iti Provincial Government of Ilocos Norte ti pagilian a China ken Taiwan.
Inbatad na a maysa pay kadagiti arapaap na ket maaddaan ti connecting flight manipud Hawaii nga agturong iti Laoag International Airport.
Nupay kasta, inlawlawag na nga agtultuloy ti pannakaipalawa ken pannakapasayaat ti runway ti Laoag International Airport tapno makapagdisso dagiti dadakkel nga eroplano iti nadakamat nga erupuerto.
Kabayatanna, mamati ni Vice Governor Matthew Marcos Manotoc a dandanin matun-uyan daytoy a kalikagum agsipud ta idi agtugaw a gobernador ket adda iti level 6 ti erupuerto ken iti agdama ket addan iti level 8.
Segun kenkuana, apaman a matun-uyan ti Laoag International Airport ti level 9 wenno Level 10 ket nakasagananton daytoy a pagdissoan dagiti dadakkel nga eroplano.
Kagiddan daytoy, inpakaammo ti bise gobernador a saan laeng a ti runway ti mannarimaan a matartarimaan.
Kunana a karaman kadagiti maipalpalawa ken mapappapintas iti agdama ti passenger terminal building.
Innayon na a mannarimaan pay ti pannakaipasdek ti baro a passenger terminal building gapu ta iti pannakapasayaat ti erupuerto ket bassit ti agdama a terminal building na.
Naamoan a mannarimaan pay a maipaspasdek ti hangar iti erupuerto tapno makapagtalinaed ti chopper a mausar iti search and rescue.
Kagiddan iti daytoy, impasigurado ti bise gobernador ti panangi-followup da a iti Department of Transportation iti pannakabayad dagiti lote a naokupar ti erupuerto.
