LAOAG CITY – Nagibunong ti gobierno probinsial ti Ilocos Norte dagiti pagkargaan ti danum wenno drum kadagiti lugar a naapektaran iti tikag gubuay iti El Niño phenomenon.
Segun ken ni Mr. Marcell Tabije, ti mangidadaulo iti Provincial Disaster Risk Reduction and Management Council nga isuda mismo ti napan nagibunong kadagiti drums ken timba kas pammilin ni Gov. Matthew Marcos Manotoc.
Inbatadna nga iti ili ti Solsona, nasurok-kumurang nga 400 a drums ken timba ti naibunong kadagiti naapektaran nga umili.
Inlawlawagna a maikarkarigatan ti panangisayangkatda ti water rationing babaen ti Bureau of Fire Protection iti nasao nga ili iti baet ti kinarigat ti pangalaanda ti danum tapno matulungan dagiti residente.
Mainaig iti daytoy, kunana nga adda met ti naipaay a 150 a timba a pagurnungan ti danum iti Brgy. Tabug ken Magnuang iti siudad ti Batac.
Kabayatanna, agtultuloy ti gobierno probinsial iti panangipaayda ti fuel subsidies, water hoses ken water pumps tapno matulungan dagiti mannalon.
