LAOAG CITY – Naipaayan ti pammigbig ti gobierno probinsial ti Ilocos Norte iti naisayangkat a “Yearly Assessment North Luzon Cluster” ti Philippine Rural Development Project idiay Olongapo City, Zambales.
Segun ken ni Mr. Hashler Garalde, Social and Environmental Safeguard Officer ti probinsia, pinusgan daytoy ni Gob. Matthew Marcos Manotoc a nangawat iti nasao a pammadayaw.
Inbatadna a daytoy ti Collaboration and Partnership Excellence Award nga inpaay ti Department of Agriculture Philippine Rural Development Project.
Malaksid iti daytoy, inpakaammona a ti Ilocos Norte ti maikasangapulo a puesto iti i-built ken maikanem a puesto iti business enterprise kadagupan dagiti 22 a probinsia iti amianan a Luzon.
Mainaig iti daytoy, inlawlawagna a malaksid iti naawat ti probinsia a plaque ket adda dagiti agkakadakkel a proyekto a maipaay iti probinsia.
Kunana a dagitoy ket mapundoan iti babaen ti “Scale Up” wenno dagiti dadakkel a proyekto ti Philippine Rural Development Project.
Segun kenkuana, iti agdama ket manarimaan ti pannakaiplastar dagiti kasapulan a dokumento tapno maparuk-atanen ti pundo.
Inbatadna a karaman ditoy ti “slaughter house” iti siudad ti Batac a mapundoan iti agarup walopulo ket lima (85) a milyon a pisos idinto a ditoy siudad ti Laoag ket siam a pulo (90) a milyon a pisos idinto a ti ili a Paoay ket pitopulo (70) a milyon a pisos.
Malaksid iti daytoy, kunana nga adda pay dagiti nalpasen a naaprobaran ti Regional Board ti para iti Vintar Warehouse a maiyestablisar idiay Brgy. Lipay iti ili ti Vintar a napundoan iti sangapulo ket maysa punto siyam (11.9) a milyon a pisos.
Inlawlawagna a manarimaan payen a maipaspasdek ti “warehouse” nga addaan ti “solar dryer” iti ili ti Paoay a napundoan iti tallopulo ket maysa punto lima (31.5) a milyon a pisos.
Innayonna nga agtultuloy ti panangkitkita ni Gob. Manotoc iti tulong ni Atty. Pancho Jose nga Ilocos Norte Agricultural and Fisheries Extension Center Director no kasano nga ad-adda pay amatulungan dagiti cooperative associations ken dagiti kakailian a pakairamanan dagiti mannalon ditoy probinsia.
