LAOAG CITY – Agsagsaganan ti gobierno probinsyal para iti maika-103 a panagkasangay daydi dati a Presidente Ferdinand Marcos intono Setyembre 11.
Segun kenni Provincial Tourism Officer Ianree Racquel, tinawen daytoy a selselabraran ti probinsya kas pananglagip kadagiti napipintas a nagapwanan ti dati a presidente a maibilang a banuar.
Inbatad na a maisayangkat nga ummuna ti misa iti Immaculate Conception, sumaruno ti wreath laying ceremony iti Marcos Monument iti ciudad ti Batac.
Atendaran daytoy dagiti opisyal ti probinsya iti panangidaulo ni Gov. Matthew Marcos Manotoc, Bise Gobernador Cecilia Araneta Marcos, Cong. Angelo Marcos Barba ken dadduma pay a bisita.
Babaen met iti online ti panagatendar ni Sen. Imee Marcos ken ken dati a Sen. Bongbong Marcos ken dadduma pay a kameng ti pamilya Marcos a saan a personal a makaatendar gapo iti mapaspasaran a pandemya.
Inpasigurado met ni Racquel a mabuya ti event iti Facebook babaen iti live streaming gapo ta limitado laeng dagiti agatendar.
Malaksid iti ciudad ti Batac ket maisayangkat pay ti misa iti Sta. Monica Church iti ili ti Sarrat.
Kabayatanna, indawat met ti gobernador ti pannakaawat ti publiko gapo iti sitwasyon gubuay ti covid ken nagyaman met iti agtultuloy a panangsappuyot ken pannakipagpaset iti tinawen a Marcos Day wenno ti panakasangay ti dati a presidente.
