LAOAG CITY – Kalikagom ti gobierno probinsyal nga agbalin a 3 a pisos ti kada KWH ti kuryente ditoy Ilocos Norte.
Daytoy ti rason nu apay a naiget a supsuportaran ti gobierno probinsyal dagiti renewable energy project kas kadagiti windmills ken solar farms.
Inrakurak daytoy ni Bokal Jonathan Torralba, ti chairman ti Committee on Agriculture kalpasan ti panagsaritada kenni Governor Matthew Marcos-Manotoc.
Kuna na a masapol a mabenepisyaran dagiti residente ditoy probinsya gapu ta isu ti paggapwan dagiti nadakamat a proyekto.
Mainaig iti daytoy, inpakaammo ni Torralba nga immay bimmisita ti Department of Energy tapnu pagsasaritaan ti posibilidad a pannakaipatungpal ti kalikagom ti gobierno probinsial.
Kabayatanna, inbatad ni Torralba a kagiddan iti panagkalikagom ti gobierno probinsyal a maipababa iti 3 a pisos iti kada Kwh ti kuryente ditoy probinsya ket masapol met a kitaen wenno adalen a naimbag ti possible nga epekto na iti aglawlaw nangruna iti pagsapulan dagiti umili.
Maipalagip nga adda dagiti mangkontra iti mailunglungalong a pannakaestablisar ti offshore windmill iti ili ti Burgos gapu iti possible a pannakadadael dagiti coral reefs a mangitunda iti panagtalaw dagiti ikan a pakaapektaran met dagiti mangngalap.
