LAOAG CITY – Mangidiaya ti libre a pagluganan ti Gobierno Probinsial para kadagiti Health Personnel ken Medical Patients.
Daytoy ti inpasingked ni Ms. Rhona Ysabelle Daoang, Information Officer II ti Communications and Media Office ti Kapitolio Probinsial.
Segun kenkuana, dagiti pay laeng naiplastar a ruta ket para iti maikadua a Distrito pakairamanan iti ili a Badoc, Currimao, Siudad ti Batac ken San Nicolas idinto a dagiti dadduma a ruta ket mai-finalized pay laeng.
Inbatadna a ti ruta manipod iti Badoc Detachment ket agturong iti Pinili Junction a mapan iti Currimao Junction a dumagas iti Batac Crossing pakairamanan ti Brgy. Baay iti Siudad ti Batac ken iti sangoanan mismo ti Gobierno Munisipal ti ili a San Nicolas.
Inlawlawagna a nasken nga iti oras ti alas syete ti bigat ket addadan nga agur-uray kadagiti nadakamat nga stop points tapno no kasta ket sakbay iti oras ti alas otso ti bigat ket naituloddan kadagiti balay-pagagasan.
Inpakaammona a walo laeng a pasaheros ti mabalin a sumakay iti uneg ti jeep kas paset ti naiget nga implementasion ti Social Distancing tapno maliklikan ti panagwaras ti Corona Virus Disease wenno COVID-19.
Kinunana nga ipakitada laeng ti Valid ID iti Driver a mangipaneknek kas maysa a Health Personnel ken Medical Patients ken maminsan laeng a mapan agitulod ken agsundo kadagiti health personnel ken medical patients ti paglugananda a jeep.
Innayonna nga addanto tarpaulin ti jeep a nakasurat ti “Libre a pagluganan para kadagiti Health Personnel ken Medical Patients” kas paglasinan dagiti tattao.
Kabayatanna, inpakaammo ti Information Officer a manamnama a mangiparuk-at ti Executive Order ni Gob. Matthew Marcos Manotoc pakaseknan iti panangilawlawag dagiti pagalagadan ti Border Patrol ken Pass Slip.
