LAOAG CITY – Nakasaganan ti gobierno probinsyal babaen iti Provincial Agriculture Office a mangipaay ti naan-anay a tulong kadagiti mannalon para iti “Second Cropping Season” wenno panawen ti panagmumula ti High Value Crops wenno HVC.
Inpakaammo ni Engr. Maria Teresa Bacnat, Officer In-charge ti nadakamat a pangopisinaan, ti kangrunaan a suporta nga ipaay ti gobierno probinsyal kadagiti mannalon ket dagiti imula da a bawang, sibuyas, lasona ken kamatis.
Inlawlawagna nga iti agdama ket malmalpasen ti panagmula ti pagay rason a mangrugrugin ti opisinada a mangkitkita iti wagas no kasano a matulungan dagiti mannalon a kas iti kalikagum ni Gob. Matthew Marcos Manotoc a maipaayan dagitoy ti naan-anay a pannarabay.
Segun kenkuana, maysa pay kadagiti patienda a dakkel a makatulong kadagiti mannalon ket ti pannakaipatungpal ti clustered farming kadagiti “major crops” wenno kangrunaan a produkto kas iti bawang, sibuyas, lasona, mangga ken kamatis.
Impasiguradona ti panangkita a naimbag ti Provincial Agriculture Office ti naiget a pannakaipatungpal ti clustered farming.
Malaksid iti daytoy, impalgakna a kas iti tarigagay ti gobernador ket addan dagiti nabirukanda a gumatang kadagiti nasao a produkto dagiti mannalon ditoy probinsia.
Maipalagip nga adda ti pammatalged ni Gob. Marcos Manotoc a tumulong ti probinsia kadagiti mannalon a mangilako kadagiti produktoda tapno dakdakkel ti mapastrekda.
