LAOAG CITY – Saan a baybay-an ti gobierno probinsyal dagiti mannalon ditoy Ilocos Norte.
Daytoy ti inpasingked ni Mr. Edwin Cariño, ti mangidadaulo iti Sustainable and Development Office iti kapitolyo probinsyal.
Inlawlawag na nga adda ti pondo nga iyalokar ti gobierno probinsyal para iti nayun a paggatang ti irik nga apiten dagiti mannalon ditoy probinsya.
Nupay kasta, kuna ni Cariño a maamoan to pay laeng kadagiti sumarsaruno a lawas no mano ti maiyalokar a pondo para iti paggatang ti irik a maapit dagiti mannalon.
Inbaga na nga iti napalabas a tawen ket adda ti 35-milyon a naiyalokar a supplemental ti paggatang ti National Food Authority (NFA) ket mangnamnama ni Cariño a kastoy met ti maiyalokar ita a tawen.
Nupay kasta, agdepende no mano ti pondo ti gobierno probinsyal gapu ta ado met dagiti paggastusan kangrunaan na ita a panawen ti pandemya.
Iti baet daytoy, inpasigurado ni Cariño a saan a mabaybay-an dagiti mannalon gapu ta isuda ti maibilang a “duri ti ekonomiya” ti probinsya.
Kabayatanna, inpakaammo ni Cariño nga iti panagsasarita da kada Engr. Eleonor Andres, ti General Manager iti NFA kadwa da ni Governor Matthew Marcos-Manotoc ket naibaga na a karugrugi da ti pondo nga agdagop ti 166-milyon a pisos a ti magatang na ket 175 ribo a bags.
Innayon na a mabalin pay ti NFA ti agkiddaw iti Department of Agriculture (DA) ti nayun a paggatang da a 19 a pisos iti kada kilo.
