LAOAG CITY – Naikeddengen ti panangrugi ti panangipaay ti gobierno ti subsidies para kadagiti modern jeepney operators.
Basar iti Land Transportation Franchising and Regulatory Board (LTFRB), manamnama ti P20,000 ti maipaay a subsidiya iti tunggal unit para kadagiti eligible nga operator nga addaan ti outstanding loan obligations-na a marigatan gapu kadagiti utangna.
Sakupen ti programa dagiti modern jeepneys ken UV Express operators iti intero a pagilian ken kadagiti buses nga agop-operate laeng iti Metro Manila.
Makatulong ti nasao a subsudiya agingga iti tallo a bulan a tennag a panagbayad kadagiti nagkautangan dagiti operators kadagiti nasao a lugan.
Kabayatanna, inbatad ni acting Land Transportation Franchising and Regulatory Board Chairman Atty. Greg Pua, a makitkita ti ahensia a kasapulan ti panangipaayda ti tulong pinansial para kadagiti kwalipikado a transport service entities gapu iti agtultuloy a panagngato ti presyo dagiti krudo ken kadagiti dadduma pay nga operational expenses-da a makaapapektar iti transportasion.
